वेल्स नेपाली समुदाय, कार्डिफलाई प्राप्त शुभकामना सन्देश

कार्डिफ काउन्सिलका लर्ड मेयरसंग परिचयात्मक भेटघाट सम्पन्न

गत २ नोभेम्बर २०१०, मंगलबारका दिन “वेल्स नेपाली समुदाय”, कार्डिफको एक प्रतिनिधि मण्डल र कार्डिफ काउन्सिलका लर्ड मेयर श्री किथ हाइड बिच परिचयात्मक भेटघाट सम्पन्न भयो। लर्ड मेयर श्री किथ हाइड र श्रीमती लर्ड मेयर आन हाइड ले “वेल्स नेपाली समुदाय”, कार्डिफका प्रतिनिधि मण्डललाई गहन सम्मानका साथ स्वागत गरेका थिए। चियापान समारोहका साथ सुरुवात भएको उक्त भेटघाट कार्यक्रममा संस्थाका अध्यक्ष श्री चित्र बहादुर राईले संस्थाको परिचय दिनुका साथै भेटघाटमा उपस्थित सम्पूर्ण पदाधिकारीहरुको परिचय दिनुभयो भने कार्यसमिति सदस्य श्री शिबजी श्रेष्ठले कार्डिफमा “वेल्स नेपाली समुदाय”को स्थापना र संस्थाको आबश्यकताबारे जानकारी दिनुका साथै संस्थाले बिगतमा गरेका क्रियाकलाप र भाबी दिनहरुमा गर्ने कार्य योजनाबारे जानकारी गराउनुभयो । लर्ड मेयर श्री किथ हाइडले नेपाली परम्परा र संस्कृति प्रति निकै चासो देखाउदै आगामी दिनहरुमा वेल्स नेपाली समुदाय, कार्डिफले आयोजना गर्ने कार्यक्रममा उपस्थित भई अझ बढी जानकारी लिन आफू खुशी रहेको जानकारी गराए । यसका साथै आगामी दिनहरुमा “कार्डिफ काउन्सिल” र “वेल्स नेपाली समुदाय”, कार्डिफ हातेमालो गर्दै अगाडी बढ्न इच्छुक रहेको जानकारी दिए। उक्त भेटघाटमा संस्थाका अध्यक्ष श्री चित्र बहादुर राईले संस्थाको उपहार र सम्मान स्वरुप नेपाली "कोथीमोडा खुकुरी" लर्ड मेयर श्री किथ हाइडलाई प्रदान गर्नुभयो। परिचयात्मक भेटघाटमा "वेल्स नेपाली समुदाय", कार्डिफको तर्फ बाट संस्थाका अध्यक्ष श्री चित्र बहादुर राई, श्रीमती संगीता राई, उपाध्यक्ष श्री रबिन्द्र तुम्बाहाम्फे, सह-सचिब श्री रामचन्द्र पोखरेल, सदस्यहरु श्री बिर बहादुर गुरुङ, श्री शिबजी श्रेष्ठ र श्री महेश देवकोटाको उपस्थिति थियो।

रिमम्बरेन्स डे मा हाम्रो सहभागिता

गत १४ नोभेम्बर २०१० को दिन कार्डिफमा आयोजना गरिएको रिमेम्बरेन्स डे मा हाम्रो संस्थाको तर्फबाट भुतपूर्व गोर्खा सैनिक, वहाँका परिवारका सदस्यहरुका साथै अन्य स्थानीय नेपाली दाजुभाई तथा दिदीबहिनीहरुले भाग लिनुभयो। बिहान १० बजे एलेक्जेन्डर बगैंचामा भेलाभई ठिक १०:५८ मा कार्यक्रमको शुरुवात भएको थियो। ११ बजेर ११ मिनेट ११ सेकेन्डको समयमा लडाईमा विरगति प्राप्त गर्ने सम्पुर्ण योद्धाहरुको सम्झनामा २ मिनेट मौनधारण गरिएको थियो। त्यसपछि राष्ट्रगान गाई उक्त भेला परेडमा परिणत हुँदै क्याथेज पार्क वरपरका स्थानमा गई अन्त्यमा स्थानीय सिटिहलमा गई समाप्त भएको थियो। कार्यक्रमको अन्तमा सिटिहलमै परेडमा सहभागिहरुका लागि चियापानको आयोजना गरिएको थियो।

थप फोटोहरु हेर्न तलको फोटोमा थिच्नुहोला

दशैं – तिहार २०६७ कार्यक्रम सम्पन्न

गत अक्टोवर २३ तारिख, शनिबारका दिन वेल्स नेपाली समुदाय, कार्डिफको आयोजनामा "दशैं – तिहार २०६७ कार्यक्रम" भब्य रुपमा सम्पन्न भयो। कार्डिफ र कार्डिफ वरपर रहेका सम्पूर्ण नेपाली दाजू भाई तथा दिदी बहिनिहरुलाई समेटदै नेपालीको महान चाडहरु दशैं र तिहार एउटै थलोमा मनाएर भरपुर मनोरंजन दिने उद्देश्यले आयोजना गरिएको उक्त कार्यक्रम साँस्कृतिक टोलीको सामुहिक प्रयासमा "यो नेपाली शिर उचाली" बोलको देशभक्ति गीतको साथमा सुरु भएको थियो। उक्त कार्यक्रममा देशभक्ति गीतले सबै नेपाली दाजुभाई तथा दिदी बहिनीहरु र पाहुनाहरुको मन छोएको देखिन्थ्यो। संस्थाका अध्यक्ष चित्र बहादुर राईले आगन्तुक पहुनाहरुलाई दशैं – तिहार २०६७ को शुभकामना संदेश दिनुभयो भने नेपाली र वेल्स राष्ट्रिय गानले सबै दाजुभाई तथा दिदीबहिनिहरुहरुलाई देशप्रेमले भाबुक बनाएको थियो।

बिभिन्न किसिमका नाच गान, कविता, उखान-टुक्का र लोकदोहोरीले भरिएको दशैं – तिहार कार्यक्रममा आफ्नै घर भित्रको प्रयासमा प्रस्तुत गरिएको साँस्कृतिक कार्यक्रम अत्यन्त रोचक र मन छुने खालका थिए। साँस्कृतिक कार्यक्रममा भाग लिएका साना साना बाबु नानी हरु देखि लिएर ठुला बडाको जोश र जाँगरले बाताबरणनै अत्यन्त उत्साहित देखिन्थ्यो। साँस्कृतिक कार्यक्रममा भाग लिने आफ्नै घर भित्रका कलाकारहरु विभूषित भट्टराई, प्राजन पोखरेल, शुभाआशिष श्रेष्ठ, प्रान्जिल पोखरेल, शौभाग्य मोक्तान, आभाष देवकोटा, आयूष्मा श्रेष्ठ, आयूष श्रेष्ठ, प्रसंशा कन्दंवा, संजिता लिंग्देन, प्रिती गुरुङ, अम्बिका गुरुङ, जेबिना तन्डुकार, रोशा चेम्जोङ, अस्मिता गुरुङ, सुमन तिमिल्सिना, महेश देवकोटा, मोति पुन, खैमति पुन, साबित्री श्रेष्ठ, सन्जु भट्टराई,चित्राकला देवकोटा, शोभा पोखरेल, अमर मल्ल, शिवजी श्रेष्ठ, रोशन भट्टराई र राम
चन्द्र पोखरेलहरुले देखाएका नेपाली सस्कृति झल्कने नाच गान, कविता, उखान-टुक्का र लोक-दोहोरीले गाउँघरनै बिर्साएको थियो।
कार्डिफको सेन्ट मेलन भिलेज हलमा भएको उक्त कार्यक्रममा सजिसजावटका झिलिमिली सामग्रीहरुले हलको रुपरंग सौन्दर्य जनक देखिन्थ्यो। देशी तथा बिदेशी पाहुनाहरुको समेत उपस्थित रहेको उक्त कार्यक्रममा पाहुनाहरु वेलायती संसदका सांसद माननीय एलन माईकल, कार्डिफ काउन्सिलका काउन्सिलर गेभिन कोक्स, कार्डिफ काउन्सिलकी डेपुटी लिडर काउन्सिलर जुडिथ उडम्यान, भोलुन्टियर एक्सन कार्डिफकी हेलेना जोन्स का साथै वेल्स गोर्खा कम्युनिटि, कुम्बरानका अध्यक्ष लक्ष्मी लिम्बुको उपस्थिति थियो भने मुख्य अतिथि एलन माइकलले नेपाली भाषाबाट दिएको दशैं-तिहार शुभकामनाले सबैको वेल्स प्रतिको आत्मियता अझ मजबुत भएको आभाष हुन्थ्यो। यसै कार्यक्रमको मध्यतिर मुख्य अतिथि एलन माईकलले संस्थाको लोगो प्रतियोगिताका बिजयी तथा सहभागि र गत समर बारबिक्युमा म्युजिकल चेयरमा प्रथमहुने भाईबहिनीहरुलाई पुरस्कार तथा प्रशंसा पत्र प्रदान गर्नुभएको थियो। दिनको ५ बजे शुरु भएको उक्त कार्यक्रम मध्यरात सम्म पनि दाजुभाई तथा दिदी बहिनीहरु आफैमा रमाउँदै नाच गानमा ब्यस्त देखिन्थे। कार्यक्रमको अन्तमा संस्थाका उपाध्यक्ष रविन्द्र तुम्बाहाम्फेले कार्यक्रमको सफलताको लागि हात बढाउने सम्पुर्ण सदस्यहरुका साथै कार्यक्रममा पाल्नुहुने दाजुभाई तथा दिदीबहिनीहरुलाई धन्यवाद दिनुभयो र साथसाथै साँस्कृतिक कार्यक्रमका सहभागिहरुलाई अध्यक्ष सहित संयुक्त रुपमा प्रशंसापत्र प्रदान गर्नुभएको थियो। कार्यक्रमको संचालन संस्थाका सचिव रोशन भट्टराई र सह-सचिव रामचन्द्र पोखरेलबाट भएको थियो।

कार्यक्रमका अन्य फोटोहरु हेर्न तलको फोटोमा थिच्नुहोला

दशैं-तिहार २०६७ कार्यक्रमका भिडियो दृश्यहरु

हालै सम्पन्न वेल्स नेपाली समुदाय, कार्डिफको दशैं-तिहार कार्यक्रमको केहि भिडियोहरु:

कार्यक्रमको शुरवात : यो नेपाली शिर उचाली (सांस्कृतिक टोलीको सामुहिक प्रयास)




जमाना नयाँ छ चाहना नयाँ छ : साना नानिहरु (प्राजन, शुभाशिष, बिभुषित, प्रान्जिल, सौभाग्य, आयुष्मा, आभाष र आयुष)



दशैं धुन (सुमन तिमिल्सिना)



गैरिखेतको शिरै हान्यो (संजिता लिङदेन)



वसन्तनै बस्न (प्रशंसा कन्दङ्वा)



कौडा नृत्य (सावित्री कार्की, शोभा पोखरेल, चित्राकला देवकोटा, रामचन्द्र पोखरेल, रोशन भट्टराई र अमर मल्ल)



घान्द्रुके ठिटी म त (अम्बिका गुरुङ र प्रिति गुरुङ)



कविता-ठट्यौली (महेश देवकोटा)



आधुनिक नृत्य (प्राजन र प्रान्जिल पोखरेल)




हिन्दी गितमा नृत्य (जेविना तन्डुकार)



आधुनिक नृत्य (संजिता लिङ्देन)

बिभिन्न विभागका उप-समिति गठन

वेल्स नेपाली समुदाय, कार्डिफका कार्यसमिति सदस्यहरुको संयोजकत्वमा हालैमात्र २ बिभिन्न विभागहरुका उप-समिति गठन गरिएको छ। हाललाई ३ सदस्यीय उप-समिति निर्माण गरिएकोमा अन्य नेपाली दाजुभाई तथा दिदीबहिनीहरुलाई पनि समेट्दै निकट भविश्यमै ५ सदस्यीय बनाइने कुरा अवगत गराउन चाहन्छौं। संस्थाका सदस्यहरु महेश देवकोटा र अमर मल्ल संयोजक रहनुभएको भिन्न उप-समितिका सदस्यहरुको नामावली यसप्रकार छ।

संगठन विस्तार विभाग उप-समिति

* महेश देवकोटा (संयोजक)
* अमृत गुरुङ (सदस्य)
* सुरज शर्मा (सदस्य)

युवा, खेलकुद तथा विधार्थी विभाग उप-समिति

* अमर मल्ल (संयोजक)
* सरोज लिम्बु (सदस्य)
* धनेन राई (सदस्य)

कार्डिफ र कार्डिफ वरपर रहनु भएका नेपाली दाजु भाई तथा दिदी बहिनीहरुलाई वेल्स नेपाली समुदाय, कार्डिफको साझा फुलबारी भित्र समेट्न प्रयास गर्ने संगठन विभागको उद्देश्य रहेको छ भने युवा, खेलकुद तथा विधार्थी विभागले नेपाली युवाहरुलाई खेलकुद तथा युवा विकाशको अन्य अरु विविध क्षेत्रमा सामेल गराउने प्रयास गर्नेछ।

वेल्स निवासी सम्पुर्ण नेपाली दाजुभाई तथा दिदीबहिनीहरुमा
बडा दशैं २०६७ को शुभ उपलक्षमा मंगलमय शुभकामना।
यस पुनित अवसरमा सम्पुर्ण नेपाली
परिवारको सुख शान्ति एवं
समृद्धिको कामना
गर्दछौं।

दशैं-तिहार २०६७ कार्यक्रम सम्बन्धि जानकारीको लागि यहाँ क्लिक गर्नुहोस।

वेल्स नेपाली समुदाय, कार्डिफको पहिलो अधिवेशन सम्पन्न

गत ३ अक्टोवर २०१० , आइतबारका दिन वेल्स नेपाली समुदाय, कार्डिफको प्रथम अधिवेशन सम्पन्न भयो। संस्थाको एक वर्षको प्रगति विवरण प्रस्तुत गर्दै त्यसमाथि छलफल गरि शुरु गरिएको अधिवेशनमा संस्थाको आयव्यय एवं सम्पत्ति विवरण प्रस्तुत गरिएको थियो। संस्थाले हालसम्म गरेका कामहरु सन्तोषजनक रहेको र आगामी दिनहरुमा यसलाई अझ प्रभावकारी बनाउँदै लैजाने कुरामा जोड दिइयो। साथसाथै संस्थाको सदस्यता वितरण अझ प्रभावकारी बनाउँदै बढी भन्दा बढी नेपाली दाजुभाई तथा दिदीबहिनीहरुलाई संस्थाको छहारीमुनि ल्याउन कोशिस गर्ने प्रतिबद्धता व्यक्त गरियो।

अधिवेशनको सुरुमा पुरानो कार्यसमितिलाई भंग गरि मानध्वज गुरुङको संयोजकत्वमा कमल केशर चेम्जोङ तथा आइत बहादुर गुरुङ सम्मिलित ३ सदस्यीय अध्यक्ष मण्डलको गठन गरियो। उक्त अध्यक्ष मण्डलले पुरानो कार्यसमितिका धेरैजसो पदाधिकारीहरु यथावत राखि थप २ जना नयाँ सदस्यहरु सम्मिलित १३ सदस्यीय कार्यसमितिको चयन गरेको छ। चयन भएका सदस्यहरुमध्येबाट तपसिलका पदाधिकारीहरुको मनोनयन गरिएको छ। यस कार्यसमितिको पदावधि २ बर्षको लागि तोकिएको छ।

अध्यक्ष - श्री चित्र बहादुर राई

उपाध्यक्ष - श्री रविन्द्र तुम्बाहाम्फे

सचिव - श्री रोशन भट्टराई

सह-सचिव - श्री रामचन्द्र पोखरेल

कोषाध्यक्ष - श्रीमति प्रितम कुमारी चेम्जोङ

सह-कोषाध्यक्ष - श्रीमति संगिता गुरुङ

जनसम्पर्क सचिव - श्री मोति प्रसाद पुन

सदस्य - श्री महेश देवकोटा

सदस्य - श्री अमर मल्ल

सदस्य - श्री पुर्णचन्द्र लिङदेन

सदस्य - श्री बिर बहादुर गुरुङ

सदस्य - श्री आइत बहादुर गुरुङ

सदस्य - श्री शिवजी श्रेष्ठ

नयाँ कार्यसमितिको बैठकले तपसिलका सदस्यहरुको संयोजकत्वमा विभिन्न विभागहरु गठन गरि बढी भन्दा बढी नेपाली दाजुभाई तथा दिदीबहिनीहरुलाई समेट्दै नेपालीका हितमा काम गर्न, सबै उमेर समुहको प्रतिनिधित्व गर्दै सामुहिक रुपमा अगाडि बढ्ने प्रतिवद्धता व्यक्त गरियो।

कार्यक्रम तथा समन्वय विभाग - रामचन्द्र पोखरेल (संयोजक)

युवा, खेलकुद तथा विधार्थी विभाग - अमर मल्ल (संयोजक)

महिला समन्वय विभाग - संगिता गुरुङ (संयोजक)

संगठन विस्तार विभाग - महेश देवकोटा (संयोजक)

नयाँ कार्यसमितिकै अर्को निर्णय अनुसार श्री मानध्वज गुरुङ र श्री जस बहादुर कन्दङ्वा लाई संस्थाको सल्लाहकारमा अर्को २ बर्षको लागि मनोनयन गरिएको छ।

लोगो प्रतियोगिताको नतिजा

यस संस्थाले आयोजना गरेको लोगो प्रतियोगितामा साना साना भाईबहिनीहरुको बिभिन्न ८ वटा लोगोका डिजाइनहरु समावेश गरिएका थिए। छनौट समितिको मताङ्कको आधारमा आयूष श्रेष्ठले डिजाइन गरेको लोगोलाई उत्कृष्ट घोषणा गरि उक्त लोगोको परिकल्पनालाई प्रयोग गरि संस्थाको लोगो बनाउने निर्णय गरिएको छ। विजयी प्रतियोगिलाई आगामी दशैं-तिहार कार्यक्रममा पुरस्कृत गरिनेछ।

दिदीबहिनीहरुको तीज कार्यक्रम

गत सेप्टेम्बर १२ तारिक, आइतवारको दिन वेल्स नेपाली समुदाय, कार्डिफ सँग आवद्ध दिदीबहिनीहरुको अग्रसरतामा कार्डिफमा पहिलो पटक तीज कार्यक्रमको आयोजना गरियो। रम्नी स्थित प्रितम कुमारी चेमजोङको आफ्नै निवासमा आयोजना गरिएको उक्त कार्यक्रममा लगभग ३० जना दिदीबहिनीहरुको सहभागिता थियो। बिहान ११ बजे देखि साँझ ५ बजे सम्म दिदीबहिनीहरु आ-आफुले बनाएर ल्याएको नेपाली स्वादका पकवानहरु खाँदै हाँसो ठट्टा र नाचगानमा व्यस्त देखिन्थे। उक्त अवसरमा वेल्स नेपाली समुदायको तर्फबाट अध्यक्ष चित्र बहादुर राईले पठाउनु भएको शुभकामना संदेश शोभा पोखरेलले पढेर सुनाउनुभएको थियो। आफ्नो संदेशमा अध्यक्ष राईले हाम्रा चेलिवेटीहरुबाट शुरु भएको यस्ता कार्यक्रमहरुको सह्राहना गर्दै भविश्यमा संस्थाको तर्फवाटपनि सहयोग हुने वाचा गर्नुभएको थियो। कार्यक्रमको अन्तमा यस्तो नेपाली संस्कृति जोगाउने कार्यक्रमहरुलाई आगामी वर्षहरुमा पनि निरन्तरता दिने वाचा गरियो। कार्यक्रमको समाप्तिमा थकित भई दिदीबहिनीहरु खुशि हुँदै आ-आफ्नो घर फर्केका थिए। कार्यक्रमको परिकल्पना गरि आयोजना गर्न कम्मर कसेर लाग्नुभएकी श्रीमती शोभा पोखरेल र श्रीमती संगिता गुरुङलाई वेल्स नेपाली समुदाय हार्दिक धन्वाद दिन चाहन्छ साथै आफ्नो घरमै कार्यक्रमको आयोजना गर्नलाई सहयोग गर्नुहुने श्रीमती प्रितम कुमारी चेम्जोङलाई पनि संस्थाको तर्फवाट हार्दिक धन्यवाद ।

कार्यक्रमको अन्य फोटोहरु हेर्न तलको फोटोमा थिच्नुहोस

वेल्स नेपाली समुदाय,कार्डिफको लोगो प्रतियोगिता

वेल्स नेपाली समुदाय, कार्डिफ यस संस्थाको बिभिन्न किसिमका कामहरु सुचारू रुपमा सञ्चालन गर्न र संस्थाका कामहरु अझ बढ़ी पारदर्शी तरिकाले गर्दै जान प्रतिबद्ध रहेको कुरा यहाँहरुलाई अवगत नै छ। यसै सिलसिलामा संस्थाका कामहरु अझ प्रभाबकारी बनाउनका लागी यस संस्थालाई एक लोगोको आवश्यकता परेको हुँदा वेल्स नेपाली समुदाय, कार्डिफ यहाँहरू समक्ष लोगो प्रतियोगितामा सामेल भई यस संस्थालाई सहयोग गरीदिनुहुन हार्दिक अनुरोध गर्दछ ।

• प्रतियोगितामा नेपाल र वेल्स झल्किने र वेल्स नेपाली समुदाय, कार्डिफ को नाम सामेल हुनुपर्ने छ।
• लोगो हातले कोरिएको वा कम्प्युटर बाट गरिएको हुन सक्दछ।
• प्रतियोगितामा सबै उमेरका ब्यक्तिले भाग लिन सक्नेछन।

लोगो बुझाउने अंतिम मिति र समय :- आइतबार ३ अक्टोबर २०१० , १२.०० बजे सम्म

लोगो प्रतियोगिताका बिजयी प्रतियोगीलाई आगामी दशैं - तिहार कार्यक्रममा पुरस्कार प्रदान गरिने छ। यस लोगो प्रतियोगिताको बारेमा अन्य जानकारीको आवश्यक परेमा कार्य समितिका कुनैपनी पदाधिकारी संग सम्पर्क गर्नुहुन अनुरोध गर्दछौं। आफ्नो लोगोको डिजाइन संस्थाका कुनैपनि पदाधिकारीलाई बुझाउन सकिने छ।

यस वर्षको दशैं-तिहार कार्यक्रम सम्बन्धि जानकारी

गत वर्षझैं यो वर्ष पनि वेल्स नेपाली समुदाय, कार्डिफले यस क्षेत्र वरिपरी बस्ने नेपालीहरु बिच मनोरन्जन गर्ने तथा आफ्नो मौलिक सांस्कृतिक परम्परालाई निरन्तरता दिने उद्देश्यले यस वर्षको विजया-दशमी तथा तिहारको उपलक्ष्यमा नेपाली कला र संस्कृति झल्काउने बिभिन्न कार्यक्रमका साथ "दशैं - तिहार २०१०" कार्यक्रम उल्लासपूर्ण तरिकाले मनाउने निधो गरेको छ। यस कार्यक्रममा सम्पुर्ण कार्डिफ वरपर तथा वेल्समा बस्ने नेपाली दाजुभाई तथा दिदीबहिनीहरुलाई उपस्थित भई कार्यक्रम सफल पार्नको लागि वेल्स नेपाली समुदाय, कार्डिफ हार्दिक अनुरोध गर्दछ।

कार्यक्रम निम्न मिति, समय र स्थानमा हुने जानकारी गराउन चाहन्छौं।

मिति: २३ अक्टोवर, शनिवार
समय: साँझ ५:०० बजे देखि ११ बजे सम्म
स्थान : St. Mellon's Village Hall
St. Mellon
Cardiff
CF3 5RT

(नोट: यहाँ दिइएको पोष्टकोड हलको पोष्टकोड हैन तर आफ्नो कारबाट जानेलाई यो पोष्टकोडमा पुगि सडकमा (Elgar Crescent) कारपार्क गर्न सजिलो हुने भएकोले यहाँ राखिएको हो। उक्त पोष्टकोडमा कार पार्क गरेपछि सजिलै हलको पछाडिपट्टिबाट प्रवेश गर्न सकिने छ। बस बाट जानको लागि सिधै Newport Road को Llanrumney, Bluebell Inn बसस्टपमा ओर्लेर हलको मुख्य प्रवेशद्वारको प्रयोग गर्न सकिने छ । कार्यक्रम स्थलको नक्सा ठुलो पारी हेर्न नक्सामै क्लिक गर्नुहोला।)

बिगतका कार्यक्रमहरु जस्तै यसपालि पनि कार्यक्रम स्थलमा प्रवेशको लागि एक व्यक्ति एक टिकटको व्यवस्था गरिएको छ। टिकट अग्रिम खुला गरिएको हुनाले आफ्नो नजिक पर्ने कार्यसमिति सदस्यहरु मार्फत तोकिएको शुल्क तिरि टिकट लिन सकिनेछ।

टिकट दर यसप्रकार छ।
प्रतिव्यक्ति: १० पाउन्ड (१६ वर्ष वा सो भन्दा माथि)
५ पाउन्ड (१० वर्ष वा सो भन्दा माथि देखि १६ वर्ष मुनि सम्म)

नोट: १० वर्ष मुनीका वालवालिकालाई नि:शुल्क प्रवेशको व्यवस्था मिलाइएको छ।

पाहुना सम्बन्धि व्यवस्था
नेपाली संस्कृति र परम्पराको आफ्नै बिशेषता र पहिचान छ। यो परम्परा र संस्कृतिलाई वेलायतका अन्य गैर नेपाली समुदायलाई पनि चिनाउने हाम्रो उद्देश्य भएकोले आ-आफ्ना गैर नेपाली साथिभाइ इष्टमित्रहरु लाई पनि पाहुनाको रुपमा ल्याउन सकिने व्यवस्था मिलाइएको छ। पाहुनाको हकमा पनि माथि उल्लेख गरे बमोजिम नै प्रवेश शुल्कको व्यवस्था गरिेएको छ।

पोशाक सम्बन्धि व्यवस्था
थुप्रै जातजाति, धर्म संस्कृति र परम्परा मिलेर नै नेपाली समाज बनेको हो। हाम्रो आफ्नो पहिचान भनेको पोशाक पनि हो। त्यसैले यो कार्यक्रममा नेपाली विविधता को एकता पस्कन सम्पुर्ण सहभागि दाजुभाइ दिदीबहिनीहरु लाई सम्भव भएसम्म आफ्नोपन झल्कने आफ्नै परम्परागत वेशभुषानै पहिरिएर आउन हार्दिक अनुरोध गर्दछौं।

अन्य जानकारीको लागि यस संस्थाका कुनैपनि कार्यसमिति पदाधिकारीलाई सम्पर्क गर्नुहुन अनुरोध गर्दछौं।

दोश्रो समर बारबिक्यू सम्पन्न

हाँसो,ठट्टा र रमाईलोको बिच यस वर्षको समर बारबिक्यू कार्यक्रम भब्य रुपमा सम्पन्न भयो। स्थानीय "बार वाई के" पवमा गत १४ अगष्ट शनिवारको दिन सम्पन्न कार्यक्रममा करिव १५० नेपाली दाजुभाई तथा दिदीबहिनीहरुको सहभागिता थियो। बिहानै देखि बारबिक्यू र अन्य चटपट खानाहरुले सुरु गरिएको कार्यक्रम बिभिन्न मनोरंजनात्मक कार्यक्रमहरु गर्दै सम्पन्न भएको थियो। टाढा टाढा देखिका नेपाली दाजुभाईहरु पनि उपस्थित भई सम्पन्न कार्यक्रममा नेपाली खानपानका साथै अन्य कार्यक्रम जस्तै म्युजिकल चेयर, समुह नृत्य आदीको पनि आयोजना गरिएको थियो। महिला दिदीबहिनीहरुको लागि सम्पन्न म्युजिकल चेयर श्रीमती संजिला खडकाले जित्नुभयो भने वालवालिकाको लागि आयोजित म्युजिकल चेयर आभाष देवकोटाले जिते। आगामी दशैं-तिहार कार्यक्रममा दुवै बिजेतालाई पुरस्कार दिने निर्णय गरिएको छ। उक्त कार्यक्रममा कार्डिफमा सम्पन्न नेपाल पर्यटन वर्ष २०११ को प्रवर्धन कार्यक्रममा आफ्ना नृत्यहरुद्वारा मनोरंजन प्रदान गर्नुहुने दिदीबहिनीहरु तथा साना नानीहरुलाई प्रोत्साहन स्वरुप संस्थाको तर्फबाट धन्यवाद दिदै एक एक वटा कार्ड दिइएको थियो। सम्पुर्ण कार्यक्रम अवधिभर सहभागि सबैले भरपुर मनोरंजन लिएको देखिन्थ्यो।
यस कार्यक्रमलाई सफल पार्नको लागि आफ्नो अमुल्य समय खर्चगरि सहयोग गर्नुहुने सम्पुर्ण दाजुभाई दिदीबहिनीहरु प्रति यस संस्था हार्दिक आभार व्यक्त गर्न चाहन्छ। साथै आगामी कार्यक्रमहरुमा पनि यस्तै सहयोगको अपेक्षा गर्दछ।

समुह नृत्यको भिडियो

वेल्स नेपाली समुदाय, कार्डिफको दोश्रो समर बारबिक्यू

गत वर्षझैं यो वर्ष पनि वेल्स नेपाली समुदय,कार्डिफले पारिवारिक समर बारबिक्यू कार्यक्रमको को आयोजना गरि संस्थाको स्थापना को प्रथम बार्षिकोत्सव भब्यरुपले मनाऊने निधो गरेको छ। कार्डिफ तथा कार्डिफ वरिपरि छरिएर रहनु भएका सम्पुर्ण नेपाली दाजुभाइ तथा दिदीबैनीहरु बिच रमाईलो भेटघाट, एकअर्का बिच भाइचारा, परिचय, तितामीठा बातचितको आदन प्रदानको साथै साल भरि भोगेर ल्याएको दु:खहरुलाई भुलेर शुखलाई अगाडि ल्याई एक पासमा भरपुर मनोरन्जन गर्ने उद्देश्यले आयोजना गर्न लागिएको यो कार्यक्रममा समस्त वेल्स निवासी नेपालीहरुलाई आमन्त्रण गरिन्छ। कार्यक्रम सम्बन्धि जानकारी तल उल्लेख गरिएको छ।

कार्यक्रम सम्बन्धि अन्य जानकारीहरु:
मिति: १४ अगष्ट २०१०, शनिवार
समय: बिहान १० बजे देखि बेलुकी १० बजे सम्म
स्थान: Bar Y.K. Pub, 1 Elm Street, Roath, Cardiff, CF24 3QR
प्रवेश शुल्क: £7 (१५ वर्ष माथी), £5 (१० देखि १५ वर्ष सम्म)। १० वर्ष मुनिलाई नि:शुल्क

नोट: प्रवेश टिकट कार्यक्रम स्थलकै मुलद्वारमा लिन सकिने व्यवस्था मिलाइएको छ। अन्य जानकारीको लागि आफ्नो नजिकैको कार्यसमिति सदस्यलाई सम्पर्क गर्नुहोला।
यसै कार्यक्रमको वेला संस्थाको साधारण सभाको बैठक पनि बस्ने कुरा अवगत गराउँदै सम्पुर्ण सदस्य महानुभावहरुको उपस्थितिको लागि अनुरोध गरिन्छ।

"नेपाल पर्यटन वर्ष २०११" प्रवर्द्धन कार्यक्रमको आयोजना

नेपाल पर्यटन वर्ष २०११ लाई विश्वव्यापी रुपमा प्रचार प्रसार गर्ने मुख्य उद्देश्य राखी वेलायतस्थित नेपाली राजदुतावासको तत्वावधानमा पर्यटन प्रवर्द्धन कार्यक्रमको रुपमा वेलायतको बिभिन्न स्थानमा आयोजना भइरहेको कार्यक्रमकै शिलसिलामा गत जुलाई ३१, शनिवारको दिन वेल्समा "नेपाल पर्यटन वर्ष २०११" को प्रवर्द्धन कार्यक्रम भव्यरुपमा सम्पन्न भएको छ। वेल्स नेपाली समुदाय, कार्डिफ र वेल्स गोर्खा कम्युनिटि, कुम्वरानले नेपाली राजदुतावासको सम्वन्वयमा कार्यक्रमको आयोजना गरेको थियो।

कार्डिफ स्थित "द गेट" हलमा बिहान ११:३० बजेदेखि सुरु भएको सो कार्यक्रमको उद्धाटन बेलायतका लागि नेपाली राजदुत डा. सुरेशचन्द्र चालिसे र बेलायती सांसद (पहिलो वेल्स सरकारका प्रथम मंत्री तथा पूर्व टोनी ब्लेयर सरकारका मंत्री) एलान माइकलले संयुक्त रुपमा दुईवटा पानसमा बत्ति बालि गर्नुभएको थियो। कार्यक्रमको सुरुवात नेपाल तथा वेल्सको राष्ट्रगानबाट गरिएको थियो।
वेल्स गोर्खा कम्युनिटि कुम्बरानका अध्यक्ष लक्ष्मी तुम्बाहाम्फेले उपस्थित पाहुनाहरुलाई स्वागत गर्नुभएको सो कार्यक्रममा राजदुत डा. चालिसेले नेपाल पर्यटन वर्ष २०११ को बारेमा प्रकाश पार्ने क्रममा बेलायती मित्रहरुलाई नेपाल भ्रमणको निम्तो दिदै नेपाल-वेलायत मित्रता लगभग दुई शताब्दी पुग्न लागेको स्मरण गराउनु भएको थियो। बेलायतको लागि हजारौं नेपालीले दुईवटा विश्वयुद्धमा भाग लिएको र तेह्र जनाले भिक्टोरिया क्रस जस्तो उच्च पदक समेत प्राप्त गरेको पनि उहाँले उल्लेख गर्नुभयो। भर्खरै वेलायती मंत्रीले नेपाल भ्रमण गरेको उल्लेख गर्दै वेलायत-नेपाल सम्वन्ध अति महत्वपुर्ण भएकोले वेलायती मित्रहरुलाई नेपालको भ्रमण गर्न आव्हान समेत गर्नुभयो। सो कार्यक्रममा आफ्नो मन्तव्य राख्दै सांसद एलान माईकलले नेपालमा १०१ वटा भाषा प्रचलित रहेकोमा आश्चर्य व्यक्त गर्दै वेल्समा दुईवटा मात्र भाषा प्रचलनमा रहेको बताउँदै नेपालको विविधता सुनेर अचम्म लागेको र नेपाल प्राकृतिक स्रोत, साधन र संस्कृतिमा कति धनि छ भन्नेकुरा यसैबाट स्पष्ट हुन्छ भन्नुभयो। सो अवसरमा उहाँले नेपाली राजदुतको अनुरोधमा वेलायती प्रधानमंत्रीलाई नेपाल भ्रमणको वातावरण बनाउन प्रयास गर्ने बताउनु भयो। नेपाल र नेपाली वेलायतको अभिन्न मित्र रहेको उल्लेख गर्दै वहाँले यस कार्यक्रमले नेपालको अझ राम्रो प्रचारप्रसार गर्न सहयोग पुगेको पनि बताउनुभयो।
कार्यक्रममा कार्डिफ नगरका डेपुटी लर्ड मेयर जेनी रीसले नेपालीहरु यति संख्यामा वेल्समा रहेकोमा खुसी ब्यक्त गर्दै नेपाली र स्थानीय निकायबीचमा सहकार्यको आह्ववान समेत गर्नुभयो। नेपालीको प्रत्येक क्रियाकलापमा आफ्नो सहयोग रहने बताउँदै उपस्थित बेलायती मित्रहरुलाई नेपालको प्राकृतिक विविधताका रसस्वादन भर्न नेपाली जनताको न्यानो आतिथ्यता स्विकार्नको लागि नेपाल भ्रमण गर्न समेत आह्ववान गर्नुभयो। कार्यक्रममा नेपाली दुतावासका मिनिष्टर काउन्सिलर झविन्द्रप्रसाद अर्यालले पावर प्वाइन्टबाट नेपालको प्राकृतिक सम्पदा, संस्कृति, भ्रमणीय मनोरम स्थान, नेपाल भ्रमण गर्दा त्यहाँका सुविधा, होटल, यातायात लगायतका बारेमा सचित्र आकर्षक ढंगले प्रस्तुतिकरण गर्नुभएको थियो।
कार्यक्रमकै बिचमा तीन पटक नेपाल भ्रमण गरिसकेका साउदम्पटनका प्याट्रिक फ्लेमिङ, नेपाल भ्रमण गरिसकेका हंगेरियन नागरिक (हाल कार्डिफ बस्ने) इमि राज, कार्डिफ विश्वविधालयका क्रिस्टोफर पेडिङटनले नेपाल भ्रमणका सिलसिलामा आफुले देखेका, भोगेका, रमाइला र मनोरम क्षण, नेपालीका आफन्ति व्यवहारका बारेमा रोचक र प्रभावकारी ढंगले आफ्ना अनुभव साटासाट गरेका थिए। पावर प्वाइन्टको मद्दत समेत लिएका उनीहरुले नेपाल एक पटक हैन, पटक पटक गइरहने स्थान भएको बताएका थिए।
कार्यक्रमको अन्तमा नेपाली संस्कृति झल्काउने दिदीबहिनीहरु (शोभा पोखरेल, चित्राकला देवकोटा र सविता भट्टराई) को तीज गीतका नृत्य, वालकलाकारहरु (प्रान्जिल पोखरेल, प्राजन पोखरेल र भिक्टिरिया के.सी.) का नृत्य तथा ब्रेकन देखि आएका गोर्खा सैनिकहरुको खुकुरी नृत्य समेत प्रस्तुत गरिएको थियो। सो सांस्कृतिक कार्यक्रमलाई उपस्थित पाहुनाहरुले निकै अभिरुचिपुर्वक नजर गरेका थिए। गीतको भाव नबुझे पनि कलाकारको जोश र संगीतको तालसँगै वेलायती पाहुनाहरु जोशिएर ताली बजाइरहेका थिए। कार्यक्रमको सुरुमा खाजाको रुपमा नेपाली परम्परागत सेलरोटी राखिएको थियो भने कार्यक्रम पश्चात दिउँसोको खानाको रुपमा शुद्ध नेपाली दाल-भात सहित नेपाली परिकारहरु राखिएको थियो। वेलायती पाहुनाहरुले थपिथपि नेपाली खानाको स्वाद लिएको देखेर हामीहरु दंग परेका थियौं। कार्यक्रमको अन्तमा सभापतित्व गरिरहेका वेल्स नेपाली समुदाय, कार्डिफका अध्यक्ष चित्र बहादुर राईले उपस्थित पाहुना लगायत सो कार्यक्रम सफल बनाउन सहयोग गर्ने सबैलाई धन्यवाद ज्ञापन गर्नुभएको थियो। कार्यक्रम रोशन भट्टराईले संचालन गर्नुभएको थियो। सो कार्यक्रमको अर्को रोचक पक्ष मञ्च अगाडि प्रदर्शनमा राखिएको खुकुरी, मादल, सारङ्गी, थैली, तामाको डाली, पानि खाने अम्खोरा, थान्का, मूर्ती, बाँसुरी, टोपी थियो जसलाई सम्पुर्ण सहभागिहरुले अभिरुचिपुर्वक हेरेका थिए।

कार्यक्रमका अन्य झलकहरु हेर्न तलको फोटोमा थिच्नुहोस

कार्यक्रमका केहि अंश (भिडियो)




कार्यक्रममा मनोरंजनका लागि पस्किएका केहि नेपाली नृत्यको भिडियोहरु

साना नानीहरु प्रान्जिल पोखरेल, प्राजन पोखरेल र भिक्टोरिया के.सी. को बालनृत्य



दिदीबहिनीहरु (शोभा पोखरेल, चित्राकला देवकोटा र सविता भट्टराई) को तिज नृत्य

ब्रेकनका गोर्खा सैनिक भाईहरुको खुकुरी नृत्य



बहिनी संजिता लिम्बुको नेपाली नृत्य

कार्डिफ फुटवल वर्ल्ड कप र हाम्रो सहभागिता

फर्स्ट स्पोर्टस कार्डिफले आयोजना गरेको वर्ल्डकप फुटबल फाइनल खेल गत ४ जुलाई २०१०, आइतवारका दिन सम्पन्न भयो। यसपालिको वर्ल्डकपमा भाग लिएका बिभिन्न देशहरुको नाम बाट कार्डिफ वरपरका टिमहरुले भाग लिएका थिए। साउथ अफ्रिकामा सम्पन्न वर्ल्डकपमा भाग नलिएको भएपनि हाम्रो "नेपाली फुटवल टिम, कार्डिफले" आफ्नो टिमको नाम "नेपाल" राख्दै प्रतिस्पर्धामा उत्रिएको थियो। गोल फुटवल सेन्टर, क्यान्टन, कार्डिफमा सम्पन्न उक्त खेलमा नेपालको अलावा ब्राजिल, क्यामरुन, इटाली, जिम्वाबे, जापान, इराक, दक्षिण अफ्रिका, अल्जेरिया, नेदरल्यान्ड, अर्जेन्टिना, फ्रान्स, उरुग्वे, होन्डुरस, ग्रिस, स्पेन, जर्मनी, घाना, इभोरी कोष्ट एवं पोर्चुगलको नामबाट टिमहरु सहभागि भएका थिए। नेपाली फुटबल टिमले इराक, दक्षिण अफ्रिका, अल्जेरिया र नेदरल्यान्ड जस्ता टिमहरुसँग भिडदै तेस्रो स्थानमा चित्त बुझाउनु पर्यो। नेपाल टिमको तर्फबाट धनेन राई, अमर मल्ल, सरोज लिम्बु, उमेश थापा, समिर लिम्बु, बिजय गुरुङ, अनुप गुरुङ र अतिथि खेलाडिको रुपमा माइकल बारबुजा ले राम्रो खेलको प्रदर्शन गरेका थिए। नेपाल टिमको लागि नेपाली फुटबल टिम, कार्डिफको सम्पुर्ण व्यवस्थापन एवं नेतृत्व रामचन्द्र पोखरेलले गर्नु भएको थियो।

थप फोटोहरु हेर्न तलको फोटोमा थिच्नुहोस

कार्डिफ फुटवल वर्ल्ड कपमा नेपाली फुटवल टिमले खेल्ने

वर्ल्ड कप फुटवलको स्वादमा रमाउनको लागि फर्स्ट स्पोर्ट्स कार्डिफले आगामी ४ जुलाई २०१० आइतवारका दिन "कार्डिफ फुटवल वर्ल्ड कप" आयोजना गर्दै छ। ५ खेलाडि एकतर्फ हुने उक्त खेलमा "नेपाली फुटवल टिम, कार्डिफ" को पनि सहभागिता रहने जानकारी गराउँदछौं। ८ जना नेपाली युवा खेलाडिलाई हाम्रो संस्थाका सदस्य रामचन्द्र पोखरेलले नेतृत्व प्रदान गर्नुहुनेछ। हाम्रो टिमलाई हौसला प्रदान गर्नको लागि हामि सम्पुर्ण कार्डिफ निवासी नेपाली दाजुभाई तथा दिदीबहिनीहरुलाई उक्त खेलमा उपस्थित भईदिनुहुन हार्दिक अनुरोध गर्दछौं। खेलको बारेमा अन्य जानकारीको लागि ०७५७५५१४९१५ नम्बरको टेलिफोन वा pokharel_rc@yahoo.co.uk मा रामचन्द्र पोखरेललाई सम्पर्क गर्नुहुन अनुरोध गर्दछौं।

कार्यक्रम सम्बन्धि जानकारी
मिति: ४ जुलाई २०१०, आइतवार
समय: दिनको १२:०० बजे
स्थान: Cardiff Gol Centre
Lawrenny Avenue
Canton
Cardiff
CF11 8BR
02920375760

आर्ट काउन्सिल वेल्स सँग सहकार्यको लागि छलफल

गत २ जुन २०१०, बुधवारको दिन वेल्स नेपाली समुदाय, कार्डिफको एक प्रतिनिधि मण्डलले आपसी सहकार्य एवं सम्बन्ध विस्तारको लागि "आर्ट काउन्सिल अफ वेल्स" की प्रतिनिधि जेनी स्टोभ सँग भेट गर्यो। रामचन्द्र पोखरेलको संयोजकत्वमा गएको उक्त टोलीमा यस समुदायका सदस्य महेश देवकोटाको सहभागिता थियो। उक्त अवसरमा विशेष गरेर कार्डिफ वरपरका नेपालीहरुलाई कसरी आर्ट सम्बन्धि काममा प्रोत्साहित गर्न सकिन्छ भन्ने विषयमा छलफल भयो। बिभिन्न कला भएर पनि यहाँ अवसर नपाएका नेपालीहरुलाई अवसर प्रदान गरि आफुमा भएको कलालाई निरन्तरता दिन तथा स्थानीय व्यक्तिहरुलाई पनि आफुमा भएको कला सिकाउनको लागि बिभिन्न तरिकाले सहयोग गर्ने बचन दिदै काउन्सिलकी प्रतिनिधि जेनिले आवस्यक परेको खन्डमा त्यसता कलालाई प्रोत्साहित गर्न आफ्नो काउन्सिलले आर्थिक सहयोग पनि गर्न सक्ने जानकारी दिइन। सोहि अवसरमा जेनीले आपसी सम्बन्ध बिस्तारको लागि काउन्सिल सँधै तत्पर रहेको जानकारी गराइन।

कार्डिफ नेपाली युवा फुटवल टोलीलाई सफलता

गत १६ मे २०१०, आइतवारको दिन ब्ल्याक भोलुन्टरी सेक्टर नेटवर्क वेल्स (BVSNW) ले आयोजना गरेको 5 x side फुटवल प्रतियोगितामा वेल्स नेपाली समुदाय, कार्डिफको युवा फुटवल टोलीले आफ्नो कुशल खेल प्रस्तुत गर्दै दोश्रो स्थान हात पार्न सफल भएको छ। "नेपाली फुटवल टिम, कार्डिफ" को नामबाट सहभागि हाम्रा युवा नेपाली खेलाडिहरुले आफ्नो दक्षता प्रस्तुत गर्दै उक्त स्थान हाँसिल गरेका हुन। स्थानीय "गल फुटबल क्लब, क्यानटन" मा आयोजना गरिएको उक्त प्रतियोगितामा कार्डिफ वरपरका १६ वटा बिभिन्न टिमले भाग लिएका थिए। समुह 'क' मा रहेको हाम्रो टोलीले अन्य ३ वटा टिमलाई पछि पार्दै ६ अंकका साथ समिफाइनलमा प्रवेश गरेको थियो। 'ह्याम्याड्रयाड' नामको टिमसँग सेमिफाइनलमा भिड्दै १-१ गोलको बराबरी गरेपछि पेनाल्टि किकको माध्यमबाट फाइनलमा प्रवेश गरेको हाम्रो टोली फाइनलमा भने 'डार्क डिस्ट्रवायर्स' नामको टिमसँग ०-३ गोलको अन्तरले पराजित भई दोश्रो स्थानमै सिमित रहेको थियो। यस्तो प्रतियोगितामा अन्य १५ टोली भन्दा अब्बल खेल प्रदर्शन गर्दै दोश्रो स्थान हाँसिल गर्न सफल भएकोमा यो संस्था आफ्ना युवा खेलाडिहरुलाई हार्दिक बधाई ज्ञापन गर्दै आगामी दिनहरुमा अझ बढि सफलता मिलोस भन्ने कामना गर्दछ।

यस संस्थाका सदस्य रामचन्द्र पोखरेलको संयोजनमा गएको कार्डिफ नेपाली युवा फुटवल टोलीको तर्फबाट यहाँका नेपाली युवा खेलाडिहरु धनेन राई, समिर लिम्बु, संदिप लिम्बु, सरोज लिम्बु, सजिन लिम्बु, रमेश लिम्बु, हिस्शे लिम्बु र संगम लिम्बुले खेलेका थिए। खेलमा हाम्रा खेलाडिहरुलाई हौस्याउनको निम्ति वे.ने.स. का पदाधिकारीहरुका साथै अन्य नेपालीहरुको पनि उपस्थिति रहेको थियो। कार्यक्रमको अन्तमा BVSNW को तर्फबाट खेलाडिहरुलाई पुरस्कार तथा पदक बितरण गरिएको थियो।

खेलका अन्य दृश्यहरु हेर्न तलको फोटोमा थिच्नुहोस्।

सहकार्यको लागि BVSNW सँग छलफल

वेल्स नेपाली समुदाय, कार्डिफले आफ्नो स्थापना देखिनै बिभिन्न सामाजिक संघ संस्थाहरु सँग भाईचारा अभिबृद्धि गर्दै सहकार्यकोलागि हात बढाइरहेको छ। यसैको निरन्तरता स्वरुप गत १३ मे २०१० को दिन हाम्रो संस्थाका एक प्रतिनिधि मण्डलले Black Voluntary Sector Network Wales (BVSNW) सँग सम्पर्क गरि छलफल गरेको छ। वेल्स एसेम्बली सरकारको आर्थिक सहयोगमा वेल्समा रहेका जातीय अल्पसंख्यकहरु (ethnic minorities)को छाता संगठनको रुपमा काम गरिरहेको उक्त संस्थासँग आबद्ध रहि कार्य गर्ने उद्देश्यले अध्यक्ष चित्र बहादुर राईको नेतृत्वमा संस्थाका सदस्य रामचन्द्र पोखरेल सहितको टोलीले BVSNW का कार्यक्रम निर्देशक माईकल फ्लानसँग भेट गरि छलफल गर्यो। उक्त अवसरमा आपसी हितका बिषयमा कुरा हुनुका साथै एकआपसमा सहकार्य गर्दै कसरी अघि बढ्ने भन्ने बिषयमा ब्यापक छलफल भयो। कार्यक्रम निर्दैशक माईकलले हाम्रो संस्थासँग सहकार्य गरि अघि बढ्नको लागि तयार रहेको जानकारी गराउँदै BVSNW को आगामी कार्यक्रमहरुको बारेमा बताउनु भएको थियो। वेल्स नेपाली समुदाय, कार्डिफका अध्यक्षले पनि BVSNW को सबै कार्यक्रमहरुमा हातेमालो गर्दै सक्दो सहभागिता जनाउने प्रतिबद्धता व्यक्त गर्नुभयो। यस भेटघाट र छलफल कार्यक्रमको संयोजन रामचन्द्र पोखरेलले गर्नुभएको थियो।
भेटघाटको अन्तमा निर्देशक माईकलले १६ मे २०१०, आइतवारको दिन BVSNW ले आयोजना गर्न लागेको 5 x side युवा फुटबल खेलको लागि नेपालीहरुको टिमको पनि सहभागिताको लागि अनुरोध गर्नुभयो। हाम्रो संथाको तर्फबाट युवा फुटबल टोली बनाई सहभागि गराउने आश्वासन दिएर त्यसको लागि आवश्यक पहल गर्ने सहमति भएको थियो।

स्व. होम बहादुर थापाको अन्तिम संस्कार सम्पन्न

गत २३ अप्रिल २०१० का दिन स्वर्गवास हुनुभएका यस संस्थाका सदस्य होम बहादुर थापाको ६ मे २०१०, बिहिबारको दिन स्थानीय थ्रोनहिल सिमेटरि तथा क्रिमेटोरियममा विशेष समारोहका बिच अन्तिम संस्कार सम्पन्न भयो। उक्त अवसरमा वहाँको परिवारका सदस्यहरु एवं वेल्स नेपाली समुदाय, कार्डिफका सदस्यहरुका अलावा कुम्बरान, ब्रेकन, अल्ट्रासोड,स्विनडन, बर्मिङघम, क्यामबरलि, लन्डन लगायतका स्थानहरुबाट पाल्नुभएका वेल्स गोर्खा कम्युनिटि, मगर संघ युके, पाल्पाली भञ्ज्याङ युके आदी संघ संस्थाहरुका सदस्यहरु सहित करिब १६० नेपाली दाजुभाई तथा दिदीबहिनीहरुको उपस्थिति रहेको थियो। कार्यक्रममा स्थानीय ल्यानरम्निका काउन्सिलरहरु डेरिक मोरगन र हिथर जोयस का साथै ल्यानरम्नि स्कुलकी शिक्षिका मिस एलनको पनि उपस्थिति थियो।

नेपाली ब्राम्हणबाट शंखध्वनिका साथ पुजापाठ गराई हिन्दु परम्परा अनुसार सम्पन्न गरिएको अन्तिम संस्कारको कार्यक्रममा मिलिटरी ब्यगपाइपर बजाएर सम्मान दिइएको थियो। स्व. थापाको पार्थिव शरिरमा वहाँका छोरा सन्तोष थापाले दागबत्ति दिएका थिए। उक्त अवसरमा मगर संघ, बेलायतका अध्यक्ष कुल बहादुर थापाले स्व. थापाको जिवनीका बारे उपस्थित सबैलाई जानकारी दिएका थिए। मृतआत्माको चिर शान्तिको लागि २ मिनेट मौनधारण पनि गरिएको थियो। स्व. थापाका परिवारमा श्रीमती, ३ छोरी र १ छोरा छन। कार्यक्रम पश्चात ल्यानरम्नि स्थित रग्बी क्लबको हलमा सम्पुर्ण उपस्थित महानुभावहरुको लागि जलपान कार्यक्रमको आयोजना गरिएको थियो।

वेल्स नेपाली समुदाय, कार्डिफ स्व. होम बहादुर थापाको आत्माको चिर शान्तिको कामना गर्दै शोक संतप्त परिवारजन प्रति ईश्वरले धैर्य धारण गर्ने शक्ति प्रदान गरुन भन्दै हार्दिक समवेदना प्रकट गर्दछ।

नयाँ वर्ष २०६७ कार्यक्रमका केहि मनोरंजनात्मक क्षणहरु

नयाँ वर्ष २०६७ कार्यक्रममा नेपाली खाना, नेपाली पहिरन सँगै गितसंगितले पनि भरिभराउ थियो। यसै कार्यक्रममा पस्किएका केहि मनोरंजनात्मक क्षणहरुको भिडियोहरु हामिलाई भर्खरै प्राप्त भएकोले यहाँ राखिएको छ।
कार्यक्रममा उपस्थित अन्य महानुभावहरुले खिच्नुभएको भिडियोक्लिपहरु पनि यहाँ राख्नको लागि उपयुक्त लागे हामीलाई जतिसक्दो चाँडो उपलब्ध गराईदिनुहुन पनि हार्दिक अनुरोध गर्दछौं।

रेशम फिरिरी गित प्रस्तुत गर्दै रामचन्द्र पोखरेल




माइतिघर गितमा नृत्य प्रस्तुत गर्दै सुनिता थापा



मखमली चोली चाँहिदैन गितमा नृत्य प्रस्तुत गर्दै प्रान्जिल पोखरेल




आमाले मायागरि किनिदिएको गितमा नृत्य प्रस्तुत गर्दै सानी नानी रस्मिता गुरुङ




चियाबारीमा हो चियाबारीमा गितमा नृत्य प्रस्तुत गर्दै प्रान्जिल र प्राजन पोखरेल




जोमसोमै बजारमा गित प्रस्तुत गर्दै रोशन भट्टराई

शोकमा वेल्स नेपाली समुदाय

यस संस्थाका कर्मठ सदस्य, ल्यानरमनि कार्डिफ निवासी भुतपूर्व गोर्खा सैनिक श्री होम बहादुर थापा को गत २३ अप्रिल २०१०, शुक्रवारको दिन असामयिक निधन भएकोमा समस्त वेल्स नेपाली समुदाय शोकमग्न भएको छ। यस दुखद घडिमा दिवंगत आत्माको चिर शान्तिको कामना गर्दै शोक संन्तप्त परिवारमा भगवानले धैर्य धारण गर्ने शक्ति प्रदान गरुन भन्ने कामना गर्दै हार्दिक समवेदना प्रकट गर्दछौं।

जरुरी जानकारी तथा सुचना
गत २४ अप्रिल २०१०, शनिवारको दिन बसेको संस्थाको आकस्मिक बैठकले श्री थापाको निधन प्रति शोक प्रस्ताव पारित गर्दै २ मिनेट मौन धारण गर्नुका साथै वहाँको पार्थिव शरिरको अन्तयष्टिको लागि पहल गर्ने निर्णय गर्दै यस संस्था सँग आबद्ध सम्पुर्ण नेपाली परिवारहरुबाट सहयोग रकम संकलन गर्ने पनि निर्णय भएको जानकारी गराइन्छ। सहयोग रकम संकलनको संयोजन श्री आइत बहादुर गुरुङ (मोबाइल नं. ०७९१९२६१३४६) ले गरिरहनु भएकोले सम्पुर्ण सदस्य महानुभावहरुलाई आ-आफ्नो सहयोग रकम यथासक्य चाँडो उपलब्ध गराईदिनुहुन हार्दिक अनुरोध गर्दछौं।

स्व. होम बहादुर थापाको अन्तिम संस्कार आगामी ६ मई २०१०, बिहिवार बिहानको १०:०० बजे निम्न स्थानमा हुने भएकोले सम्पुर्ण कार्डिफ निवासी नेपाली दाजुभाई तथा दिदीबहिनीहरुलाई उपस्थित भई दिवंगत आत्माको चिर शान्तिको कामना गर्दै श्रद्धा सुमन अर्पण गरिदिनुहुन हार्दिक अनुरोध गर्दछौं।

स्थान:
Thronhill Cemetery & Crematorium
Thronhill Road
Llanishen
Cardiff
CF14 9UA

हाम्रो नयाँ वर्ष २०६७ कार्यक्रम

वेल्स नेपाली समुदाय, कार्डिफले आफ्नो स्थापना पछिको पहिलो नयाँ वर्ष कार्यक्रम गत १७ अप्रिल २०१० का दिन भब्यताका साथ मनायो। स्थानीय ट्रिमोर्फा पार्कको रग्बि क्लबमा सम्पन्न भएको यस कार्यक्रममा नेपाली खानपानका साथै बिभिन्न मनोरंजनात्मक कार्यक्रम प्रस्तुत गरिएको थियो। हाम्रो संस्थाले आफ्नो स्थापनाको छोटो अवधिमै बिभिन्न कार्यक्रहरु सम्पन्न गरेको छ।

जहाँ जन्म्यौं त्यहाँको संस्कृतिलाई आत्मासाथ गर्दै जगेर्ना गर्नुपर्छ भन्ने भावनाले कार्यक्रमको शुरु नेपाली तथा वेल्सको राष्ट्रगान बाट गरिएको थियो। कार्डिफ र यस क्षेत्र वरपर रहेका नेपालीहरुको उल्लेखनीय सहभागिता रहेको कार्यक्रममा वेल्सका प्रथम मंत्री तथा लेबर पार्टीका तर्फबाट वेलायती संसदका निवर्तमान सांसद एवं पूर्व क्याबिनेट मंत्री एलान माइकल, लिबरल डेमोक्र्याटकी निवर्तमान सांसद जेनी विल्लट, लिबरल डेमोक्र्याटकी वेल्स एसेम्बली सदस्य जेनी रेन्डरसन, लेबर पार्टीका काउन्सिलरहरु हिथर जोयस, डेरेक मोरगन तथा ज्याक्की पारी लगायतका वेलायती पाहुनाहरुको बिच नेपाली राजदुतावासका कन्सुलर अफिसर खिमानन्द भुसाल समेतको उपस्थितिमा विविध सांस्कृतिक कार्यक्रमको आयोजना गरिएको थियो।

सानी नानी प्रान्जील र प्राजन पोखरेलको नृत्यले सबैको मन तानेको थियो भने डाटफोर्ड केन्ट बाट आउनुभएकी कलाकार सुनिता थापाको माइतिघर गीतको नृत्यले सहभागीहरुलाई तताइरहेको थियो। अझ स्थानीय कलाकारहरु संजिता लिम्बु र रोशा लिम्बुको नृत्यले सबैलाई उफारिरहेको देखिन्थ्यो। स्थानीय गायकहरु रामचन्द्र पोखरेल र रोशन भट्टराईले नेपाली संगितमा आफ्नो गित प्रस्तुत गर्दा सबै झुमेका देखिन्थे जसमा अझ रौनकता थप्नेकाम गर्नुभएको थियो केन्टदेखि आउनुभएका कलाकार दिपक थापाले। लन्डनदेखि आएका सारंगी बजाउने टोलीलाई हाम्रै अध्यक्ष चित्र बहादुर राईले मादल बजाएर रेशम फिरिरी अनि सिमसिमे पानीमा बोलको धुनमा साथ दिइरहनुभएको थियो। कार्यक्रमको अन्ततिर खोलिएको राफल चिठ्ठाले पनि एकछिन सबैलाई मनोरंजन दिएको थियो।

यस कार्यक्रमको शुरुमा नयाँ वर्षको शुभकामना आदानप्रदान गरिएको थियो । यसै अवसरमा नेपाली नयाँ वर्षको शुभकामना दिदै पूर्व क्याबिनेट मंत्री एलान माइकलले नेपाली समुदाय वेल्सको लागि महत्वपुर्ण छ भन्दै यो समाजको प्रगतिको कामना गर्नुभयो। कार्यक्रममा अर्की निवर्तमान सांसद जेनी विल्लटले वेल्समा रहेका नेपालीहरुको कार्यक्रममा पहिलो पटक सहभागि हुन पाएकोमा खुशि व्यक्त गर्दै सम्पुर्ण नेपालीहरुलाई नयाँ वर्षको शुभकामना दिइन। नेपाली दुतावासका सहचारी खिमानन्द भुसालले पनि वेल्समा रहेका नेपालीहरुलाई शुभकामना व्यक्त गर्नुभयो। संस्थाका अध्यक्ष चित्र बहादुर राईले बिक्रम संवतको शुरुवात कसरी भयो भन्ने बारे रोचक ढंगले प्रस्तुत गर्दै कार्यक्रमको सफलताको लागि हातमा हात मिलाई सहयोग गर्ने व्यक्ति संध संस्था एवं कार्यक्रमका सहभागिहरुलाई धन्यवाद दिनुभयो। सहभागिहरु सबैजनाले आ-आफ्नो तरिकाले समुहमा नृत्यगर्दै कार्यक्रमको समापन गरिएको थियो।

(कार्यक्रमका अन्य फोटोहरु हेर्न तलको फोटोमा थिच्नुहोस ।)

नयाँ वर्ष २०६७ को हार्दिक शुभकामना

वेल्स निवासी सम्पुर्ण नेपाली दाजुभाई तथा दिदीबहिनीहरुमा
नयाँ बर्ष २०६७ को हार्दिक मंगलमय शुभकामना।
यस पावन अवसरमा सम्पुर्ण नेपाली
परिवारको सुख शान्ति एवं
समृद्धिको कामना
गर्दछौं।

नव वर्ष २०६७ कार्यक्रमको जानकारीको लागि यहाँ क्लिक गर्नुहोस।

स्थानीय काउन्सिलरहरु सँग भेटधाट

वेल्स नेपाली समुदाय, कार्डिफले बेलायतभित्र पनि एउटा सानो नेपालको आभास दिएको मात्र हैन बेलायतको स्थानीयतालाई आत्मसात गरेर आफ्नोपन र स्थानीयता बिचमा सामन्जस्य ल्याउने कार्यमा समेत लागिपरेको छ। भरखरै स्थापित हाम्रो संस्था आफ्नो स्थापनाकालदेखि नै स्थानीय सरकार, संसद, काउन्सिल एवं समुदायसँग सम्बन्ध बिस्तारमा लागिरहेको छ। यसैको निरन्तरताको रुपमा गत ३१ मार्च २०१०, बुधबार स्थानीय ल्यानरमनिका काउन्सिलरहरु सँग हाम्रो समुदायको एक प्रतिनिधि मन्डलले भेटधाट तथा छलफल गर्यो। यस संस्थाका अध्यक्ष चित्र बहादुर राईको नेतृत्वमा गएको उक्त प्रतिनिधि मन्डलले ल्यानरमनिका काउन्सिलरहरु Derrick Morgan, Heather Joyce तथा Jackie Parry सँग भेट गरेको थियो। हाम्रो प्रतिनिधि मन्डलमा अध्यक्ष राईको अलावा उपाध्यक्ष रविन्द्र तुम्बाहाम्फे, सदस्यहरु हुम बहादुर थापा, कमल केशर चेम्जोङ्ग, उर्मिला श्रेष्ठ, बिभुषणमान श्रेष्ठ तथा शिवजी श्रेष्ठ हुनुहुन्थ्यो।

उक्त भेटधाटमा हाम्रो समुदायको तर्फबाट समुदायको उद्देश्य, कार्डिफ तथा स्थानीय ल्यानरमनिमा नेपाली हरुको उपस्थिति, स्थानीय समुदायसँगको एकआपसमा सहसम्बन्ध, स्थानीय गतिविधिमा नेपाली समुदायले खेल्नुपर्ने भूमिका, स्थानीय नेपाली बिधार्थीहरु अध्यनरत बिध्यालयहरुमा नेपाली साँस्कृतिक पर्वहरुको बारेमा जानकारीमुलक कार्यक्रम आयोजना समावेशको प्रयास गर्ने लगायतका बिषयमा छलफल भएको थियो। सो सम्बन्धमा स्थानीय बिधालयका गभर्नर समेत रहेकि काउन्सिलर Jackie Parry ले हाम्रो प्रस्तावको स्वागत गर्दै त्यसको लागि पहल गर्ने प्रतिबद्धता समेत व्यक्त गरिन। सो अवसरमा नेपालको सुन्दरता र गोर्खालीको विरताको बर्णन गर्दै काउन्सिलरहरुले नेपालीहरु सँग यसरी भेटेर अन्तर्क्रिया गर्न पाउँदा खुशि लागेको बताउँदै आगामी दिनहरुमा नेपाली समुदायालाई काउन्सिल तथा स्थानीय निकाय एवं समुदायद्वारा आयोजना गरिने कार्यक्रमहरुमा सहभागि गराइने, तथा नेपाली समुदायको कार्यक्रमहरुमा पनि आफुहरुलाई सहभागि गराउन अनुरोध गरे।

भेटधाटको अन्तमा काउन्सिलरहरुले आगामी २१ अप्रिल २०१० मा हुनलागेको स्थानीय समुदायद्वारा आयोजित कार्यक्रममा नेपालीहरुलाई आमन्त्रित गरे भने नेपाली समुदायको तर्फबाट पनि आगामि १७ अप्रिल २०१०, शनिबार कार्डिफमा हुन गइरहेको नेपाली नयाँ वर्ष कार्यक्रममा काउन्सिलर- हरुलाई निमन्त्रण गरियो।

नव वर्ष २०६७ को कार्यक्रम सम्बन्धि जानकारी

-------------------------------------------------------------------------------------------------------------------------------------------------------
**यस अघिको ब्लगमा यो कार्यक्रम १३ अप्रिल २०१० मा गर्ने भनिएपनि बिभिन्न प्राविधिक कठिनाईहरुका कारण केहि दिन पर सार्नुपरेको कुरा अवगत गराउनुका साथै यसबाट पर्नगएको असुविधाको लागि क्षमा चाहन्छौं। **
-------------------------------------------------------------------------------------------------------------------------------------------------------

बिभिन्न साँस्कृतिक एवं मनोरंजनपूर्ण कार्यक्रमहरुको साथ नव वर्ष २०६७ लाई स्वागत गर्ने अभिप्रायले आउँदो १७ अप्रिल २०१० (०४ बैशाख २०६७) शनिवारको दिन वेल्स नेपाली समुदाय, कार्डिफले "नयाँ वर्ष २०६७" कार्यक्रम भब्य रुपमा आयोजना गर्दैछ। उक्त कार्यक्रममा सम्पुर्ण नेपाली दाजुभाई तथा दिदीबहिनीको उपस्थिति एवं सहभागिताको अपेक्षा गर्दछौं। बिगतका कार्यक्रमहरु झैं यो कार्यक्रममा पनि यहाँहरुको सहयोग र सदभाव अपरिहार्य रहने छ। यो बिरानो मुलुकमा पनि हातमालो गर्दै आफ्नो संस्कृति र परम्परालाई निरन्तरता दिन हात बढाऔं।

कार्यक्रम सम्बन्धि जानकारी यसप्रकार छ।

मिति : १७ अप्रिल २०१० (०४ बैशाख २०६७), शनिवार
समय : १५:०० बजे देखि २२:०० बजे सम्म
स्थान : St. Alban's Rugby Club
Tremorfa Park
Tremorfa
Cardiff
CF24 2RN
(कार्यक्रम स्थलको नक्सा ठुलो पारि हेर्न नक्सामै क्लिक गर्नुहोला)

बिगतका कार्यक्रमहरु जस्तै यसपालि पनि कार्यक्रम स्थलमा प्रवेशको लागि एक व्यक्ति एक टिकटको व्यवस्था गरिएको छ। टिकट अग्रिम खुला गरिएको हुनाले आफ्नो नजिक पर्ने कार्यसमिति सदस्यहरु मार्फत तोकिएको शुल्क तिरि टिकट लिन सकिनेछ।

टिकट दर यसप्रकार छ।
प्रतिव्यक्ति: १० पाउन्ड (१६ वर्ष वा सो भन्दा माथि)
५ पाउन्ड (१० वर्ष वा सो भन्दा माथि देखि १६ वर्ष मुनि सम्म)

नोट: १० वर्ष मुनीका वालवालिकालाई नि:शुल्क प्रवेशको व्यवस्था मिलाइएको छ।

अन्य जानकारीको लागि यस संस्थाका कुनैपनि कार्यसमिति पदाधिकारीलाई सम्पर्क गर्नुहुन अनुरोध गर्दछौं।

वेलायती सांसद र वेल्स एसेम्बलि सदस्यसँग भेटघाट

वेल्स नेपाली समुदाय, कार्डिफका सदस्यहरुको हित तथा स्थानीय कार्यक्रमहरुमा स्थानीय समुदायसँग सहकार्य जस्ता कुराहरुमा सामन्जस्य गर्ने उदेश्यले ५ मार्च २०१०, शुक्रवारको दिन हाम्रो संस्थाको एक प्रतिनिधि मण्डलले कार्डिफ सेन्ट्रललाई प्रतिनिधित्व गर्ने वेलायती संसद सदस्य "जेनि विल्लट" तथा वेल्स एसेम्बलि सदस्य "जेनि रेन्डरसन" सँग भेटघाट गर्यो। संस्थाका अध्यक्ष चित्र बहादुर राईको नेतृत्वमा गएको सो प्रतिनिधि मण्डलमा उपाध्यक्ष रविन्द्र तुम्बाहाम्फे, सह-कोषाध्यक्ष श्रीमती संगिता गुरुङ, सदस्य शिवजी श्रेष्ठ र युवा बिधार्थीको प्रतिनिधित्व गर्दै सुश्री सिमरन तुम्बाहाम्फे संलग्न हुनुहुन्थ्यो। गत वर्ष अगस्ट महिनामा स्थापना गरिएको हाम्रो समुदायले कार्डिफ एवं वरपर बसोबासरत नेपाली तथा नेपाली मूलका वेलायती नागरिकहरुलाई सामाजिक रुपमा संगठित गरि बिभिन्न कार्यक्रमहरु संचालन गरिसकेको छ। स्थानीय निकाय एवं समुदायसँग सहकार्य गर्ने उदेश्यले यस अघि पनि स्थानीय काउन्सिलर हुँदै सांसद एवं एसेम्बलि सदस्य सँग भेटघाट गरिएको हो।

उक्त भेटको अवसरमा हाम्रो प्रतिनिधि मण्डलले नेपालीहरुको वेलायतको स्थिति, वेल्समा नेपालीहरुको आगमन, संस्थाको उदेश्य, स्थानीयता सँगको सहकार्य, पूर्व गोर्खा सैनिकको समस्या, नेपाली विधार्थीहरुले भोग्नुपरेको बर्तमान समस्या, नेपाली कला, संस्कृति सँगै स्थानीय निकायले संचालन गर्ने कुनैपनि सामाजिक, साँस्कृतिक कार्यक्रममा नेपाली समुदायको सहभागिता, वेल्स तथा नेपाली बिधार्थीहरुबिच साँस्कृतिक आदानप्रदान लगायतका बिषयहरुमा छलफल भएको थियो। सो भेटघाटमा सांसद तथा एसेम्बलि सदस्यहरुले अभिरुचिपूर्वक नेपालीहरुको वेल्समा उपस्थिति, संख्यात्मक स्थिति, नेपाली संस्कृति, नेपाली बालबालिकाहरुको साथै नेपाली राष्ट्रिय दिवसको बारेमा समेत चासो राखेका थिए। सो अवसरमा सांस्द एसेम्बलि सदस्यहरुले नेपाली राष्ट्रिय दिवसमा आफुहरुलाई पनि सहभागि गराउन र वेल्सको स्थानीय गतिविधिमा नेपालीहरुलाई सहभागि हुन अनुरोध पनि गरे।
सहकार्य, साँस्कृतिक सहसम्बन्ध र सदभावको चिनारी दिने उदेश्यले हाम्रा प्रतिनिधिहरु कोहि नेपाली दौरासुरुवाल, कोहि नेपाली महिला पोशाक, कोहि स्थानीय वेल्सको चिन्ह झल्किने पोशाकमा गएका थिए। यस्तो कार्य र नेपाली प्रतिनिधिहरुबाट आफुहरु प्रभावित भएको बताउँदै सांसद विल्लटले यसलाई सकारात्मक रुपमा लिएको भन्दै सहकार्यको लागि आफुहरु उत्सुक रहेको समेत उल्लेख गरिन।
भेटघाटको क्रममा वेल्स नेपाली समुदाय, कार्डिफको तर्फबाट अध्यक्ष चित्र बहादुर राईले वेल्स एसेम्बलि सदस्यलाई कलात्मक नेपाली आँखिझ्याल तथा विश्वप्रसिद्ध परम्परागत नेपाली खुकुरीको मिनियचर पनि प्रदान गर्नुभएको थियो।