Wednesday, 2 March 2011

राष्ट्रिय सेन्ट डेविड्स दिबसमा हाम्रो सहभागिता र भुमिका

१ मार्च २०११, मंगलवार, भर्खरै मात्र विभिन्न हर्ष र उल्लासका साथ कार्डिफ काउन्सिलको आयोजनामा “राष्ट्रिय सेन्ट डेविड्स दिबस” भब्य रुपमा सम्पन्न भएको छ। वेल्सको राजधानी कार्डिफमा “राष्ट्रिय सेन्ट डेविड्स दिबस” मनाउन भेला भएका विभिन्न समुदायका जनमानसमा आ-आफ्नो देशको राष्ट्रिय पोशाकले बडो अचम्म लाग्दो रौनक ल्याएको थियो भने हामी वेल्समा छौँ र वेल्सलाई मायाँ गर्छौं भन्दै वेल्सको राष्ट्रिय झन्डा फर्फराउदै हसिलो मुद्रामा देखिएका सम्पूर्ण जन समुदाय अरु सबै कुरा बिर्सेर आफैमा रमेका देखिन्थे। वेल्सका स्थानीय बासिन्दा र बिदेशबाट वेल्समा आई बसोबास गर्ने विभिन्न समुदायका जनमानसको सहभागिता बराबर देखिन्थ्यो। विभिन्न रंगी बिरंगी कपडामा सजिएका जन समुदायले आ-आफ्नो बाजागाजा मार्फत भूमिनै थर्काएका थिए भने बाजागाजा सहितको टोलि स्कटल्याण्ड देखि धाउन पनि पछि नपरेका देखिए,"वेल्स नेपाली समुदाय, कार्डिफ"को लागि पाईपरको ब्यबश्था श्री खुशिमान गुरुङ-अफिसर कमान्डर, ब्रेकनले गर्नुभएको थियो ।
हाम्रा नेपाली दाजू-भाई तथा दिदीबहिनीहरु आफ्नो राष्ट्रिय पोशाकमा सजिएर “वेल्स नेपाली समुदाय, कार्डिफ” को ब्यानर र वेल्सको झन्डा बोकेर परेडमा उपस्थित हुँदा त्यो भूमिमा सधै भन्दा बेग्लै अनुभूति र गौरब आफैमा गुन्जिरहेको थियो भने माईक्रोफोन समातेर मन्चमा भाषण गर्ने प्रतेक बिशिस्ट व्यक्तिहरुको बोलिबाट “वेल्स नेपाली समुदाय” प्रति देखाएका सम्मान र उनीहरुले नेपालीहरु प्रति देखाएका ईज्जतपूर्ण व्यवहार र हामी त्यहाँ उपस्थित हुँदा उनीहरुले अनुभब गरेको गौरबपूर्ण बातावरणले प्रतेक नेपालीको मुटु गौरबले भुक्क फुलेको थियो। बिदेशी भूमिमा रहेर पनि आफ्नो देश, भेष र संस्कृतिलाई सधै उँचो बनाउन गरेको त्यो उपस्थितिको महत्व त्यहाँ उपस्थित हुँदा देखिएको अनुभूतिले नेपाल र नेपालीप्रतिको सदभाब र मायाँ अझ गाडा भएको प्रस्ट हुन्थ्यो।
कुनै पत्रकार नेपाली टोपीका बारेमा अन्तरबार्ता लिईरहेका थिए भने अरु कैयौं पत्रकारहरु नेपाली दौरा सुरुवाल, दिदीबहिनीहरुको पहिरनको र नेपालको बारेमा जानकारी लिन तछाड मछाड गर्दै क्यामरा र माइक्रोफोन तेर्स्याउदै थिए त सयौं दर्शकहरु बाटोको वरिपरी उभिएर नमस्कार र हेलो गोर्खाली भन्न ब्यस्त देखिन्थे, एता हाम्रा दाजू-भाई तथा दिदीबहिनीहरु नमस्ते फर्काउदै र हात हल्लाउदै आफैमा गौरबान्वित देखिन्थे।
वेल्सको राजधानी कार्डिफमा भएको हाम्रो यो सहभागिता यस्ता खालका कार्यक्रममा पहिलो सहभागिता हो र यस सहभागिताले हामी र हाम्रो देश, भेष र संस्कृतिलाई चिनाउन ठूलो भूमिका खेलेको छ। जीवनको यस्तो धेरै महत्वपूर्ण घडीमा आफ्नो काम, धाम, थकाई, भोक र तिर्खालाई त्यागेर उपस्थित हुनुहुने सम्पूर्ण नेपाली दाजू-भाई तथा दिदीबहिनीहरु प्रति “वेल्स नेपाली समुदाय, कार्डिफ” हार्दिक धन्यवाद ज्ञापन गर्दै आउँदा दिनहरुमा पनि यस्तै सदभाब र सहयोग आदान प्रदान जारी रहनेछ भन्ने कुरामा हामी विश्वस्त रहेका छौँ।
वेल्सको राजधानी कार्डिफको सिटि हलको प्रांगणमा दिनको १२.१५ मा शुरु भएको उक्त भेला परेडमा परिणत भई किंग्सवे - सेन्ट मेरी स्ट्रीट - मिल लेन हुँदै - द हेसको प्रांगणमा आई करिब १३.३० मा बिसर्जन गरिएको थियो। वेल्स नेपाली समुदाय, कार्डिफका तर्फबाट संस्थाका अध्यक्ष श्री चित्र बहादुर राईले नेतृत्व गर्नुभएको उक्त परेडमा कार्डिफका विभिन्न क्षेत्र र ब्रेकन बाट आउनुभएका करिब ३५ नेपाली दाजू-भाई तथा दिदीबहिनीहरुको सहभागिता थियो।

बिशेष धन्यवाद!

यस कार्यक्रममा पाईपर उपलब्ध गराई ठूलो सहयोग गर्नुहुने मेजर खुशी मान गुरुङ ( अफिसर कमान्डर, ब्रेकन) र संस्थाको ब्यानर उपलब्ध गराई सहयोग गर्नुहुने श्री विभूषण मान श्रेष्ठ लाई “वेल्स नेपाली समुदाय, कार्डिफ” बिशेष धन्यवाद ज्ञापन गर्दछ।


.अरु फोटोहरुको लागि तलको फोटोमा थिच्नुहोला!
.

.


Saturday, 29 January 2011

राष्ट्रिय होलोकस्ट सम्झना दिन वेल्स २०११ र हाम्रो सहभागिता

गत २७ जनवरी २०११ बिहिवारका दिन कार्डिफ काउन्सिलको आयोजनामा “राष्ट्रिय होलोकस्ट सम्झना दिन वेल्स २०११” भब्य रुपमा सम्पन्न भयो। अंग्रेजी वर्ष १९३३ देखि १९४५ सम्म बिशेषगरि युरोपियन देशमा भएको उक्त भयानक हत्याकाण्ड कहिल्यै बिर्सन नसकिने घटना भएको सबैमा ठहर थियो। बिरलै मात्रामा पाईने मास हत्याकाण्डमा होलोकस्ट हत्याकाण्ड एक थियो भने उक्त हत्याकाण्डमा जम्मा जम्मी ११ मिलियन हत्यामा, ६ मिलियन जिविस जनता र १.१ मिलियन बच्चाबच्ची मारिएको अनुमान छ। नोकरशाही फासिस्ट शासन ब्यबश्थाले गरेको उक्त हत्याकाण्ड जातीय, प्रजातीय, धार्मिक, बैचारिक र राजनीनिक भिन्नता माथिको कहाली लाग्दो धम्कि थियो।
समय बित्दै जाँदा होलोकस्टमा बाँच्नेको संख्या घट्दै गयो भने उनीहरुले भन्ने कथा जस्तो लाग्ने सत्य कहानी इतिहास बन्न पुग्यो। बिगतमा भएका ठुला गल्तीबाट पाठ सिक्न र यस्ता अत्याचार भबिस्यमा हुन नदिन पहल हुनुपर्ने कुरामा केन्द्रित रहेको उक्त सम्झना कार्यक्रम होलोकस्ट हत्याकाण्डमा हत्या भएका र त्यहाँ बाट बाँचेर फर्कनेहरुलाई सम्झने अति महत्वपुर्ण क्षण थियो।
सिटी हल कार्डिफमा भएको यस्तो महत्वपुर्ण क्षणमा आफ्नो बहुमुल्य समय खर्चेर उपस्थित हुनुहुने नेपाली दाजू भाई तथा दिदीबहिनीहरु चित्र बहादुर राई, संगीता राई, मोति प्रसाद पुन, बिराशंकर राई, राधिका राई, रबिन्द्र तुम्बाहाम्फे, शसी तुम्बाहाम्फे, चित्रा देवकोटा, महेश देवकोटा, बिर बहादुर गुरुङ, लोकनाथ अधिकारी, पदम गुरुङ, हर्क बहादुर राई, ईच्छा राई, कमला थापा, कविता थापा, शोभा पोखरेल र राम चन्द्र पोखरेल प्रति “वेल्स नेपाली समुदाय, कार्डिफ” हार्दिक धन्यवाद ज्ञापन गर्दछ।
.
होलोकस्ट सम्बन्धि अरु जानकारीको लागि तलको लिंक हेर्नुहोला।
http://www.ushmm.org/wlc/en/article.php?ModuleId=10005143
http://www.hmd.org.uk/about/



नोट – होलोकस्ट सम्बन्धि जानकारी निम्न लिंकहरुबाट लिईएको हो।
http://www.ushmm.org/wlc/en/article.php?ModuleId=10005143
http://www.hmd.org.uk/about/


.

Sunday, 2 January 2011

कार्यक्रम तथा समन्वय बिभाग उप-समिति गठन

“वेल्स नेपाली समुदाय, कार्डिफ”, नेपाली कला र संस्कृतिको जगेर्ना गर्न र भाबी पुस्तामा आफ्नो कला र संस्कृतिले निरन्तरता पाउनु पर्छ भन्ने कुरामा सधै विश्वस्त रहेको कुरा यहाँहरुलाई अबगत गराउन चाहन्छौ।
यसै अन्तर्गत गत ३ अक्टोवर २०१० मा बसेको संस्थाको कार्यसमितिको बैठकले संस्थाका कामहरु अझ सरल र पारदर्शी बनाउदै जाने र नेपाली कला र संस्कृतिको जगेर्नामा सकेसम्म बढी जोड दिने उदेश्यले विभिन्न विभागका उप-समिति गठन गर्ने निर्णय अनुसार हालसालै ६ सदस्यीय कार्यक्रम तथा समन्वय बिभाग उप-समिति गठन भएको छ। संस्थाका सह-सचिब श्री रामचन्द्र पोखरेलको संयोजकत्वमा गठित कार्यक्रम तथा समन्वय बिभाग उप-समितिको नामावली निम्न प्रकार छ।

कार्यक्रम तथा समन्वय बिभाग उप-समिति

संयोजक - श्री रामचन्द्र पोखरेल
सदस्य - श्री विभूषणमान श्रेष्ठ
सदस्य - श्री अमर मल्ल
सदस्य - श्री शिब गुरुङ
सदस्य - श्री सजिन मादेन
सदस्य - श्री समिर लिम्बु

संस्थाको विभिन्न विभागका उप-समिति गठन गर्ने निर्णय अनुसार संस्थाका सदस्यहरु महेश देवकोटा (संगठन विस्तार विभाग उप-समिति) र अमर मल्ल (युवा, खेलकुद तथा विधार्थी विभाग उप-समिति) संयोजक रहनुभएको भिन्न उप-समितिहरु पनि पहिलेनै गठन भईसकेको कुरा जानकारी गराउन चाहन्छौ। यस सम्बन्धि अरु जानकारीको लागि यसै ब्लगमा प्रकाशित समाचार हेर्नुहोला।

.

Monday, 29 November 2010

कार्डिफ काउन्सिलका लर्ड मेयरसंग परिचयात्मक भेटघाट सम्पन्न

गत २ नोभेम्बर २०१०, मंगलबारका दिन “वेल्स नेपाली समुदाय”, कार्डिफको एक प्रतिनिधि मण्डल र कार्डिफ काउन्सिलका लर्ड मेयर श्री किथ हाइड बिच परिचयात्मक भेटघाट सम्पन्न भयो। लर्ड मेयर श्री किथ हाइड र श्रीमती लर्ड मेयर आन हाइड ले “वेल्स नेपाली समुदाय”, कार्डिफका प्रतिनिधि मण्डललाई गहन सम्मानका साथ स्वागत गरेका थिए। चियापान समारोहका साथ सुरुवात भएको उक्त भेटघाट कार्यक्रममा संस्थाका अध्यक्ष श्री चित्र बहादुर राईले संस्थाको परिचय दिनुका साथै भेटघाटमा उपस्थित सम्पूर्ण पदाधिकारीहरुको परिचय दिनुभयो भने कार्यसमिति सदस्य श्री शिबजी श्रेष्ठले कार्डिफमा “वेल्स नेपाली समुदाय”को स्थापना र संस्थाको आबश्यकताबारे जानकारी दिनुका साथै संस्थाले बिगतमा गरेका क्रियाकलाप र भाबी दिनहरुमा गर्ने कार्य योजनाबारे जानकारी गराउनुभयो । लर्ड मेयर श्री किथ हाइडले नेपाली परम्परा र संस्कृति प्रति निकै चासो देखाउदै आगामी दिनहरुमा वेल्स नेपाली समुदाय, कार्डिफले आयोजना गर्ने कार्यक्रममा उपस्थित भई अझ बढी जानकारी लिन आफू खुशी रहेको जानकारी गराए । यसका साथै आगामी दिनहरुमा “कार्डिफ काउन्सिल” र “वेल्स नेपाली समुदाय”, कार्डिफ हातेमालो गर्दै अगाडी बढ्न इच्छुक रहेको जानकारी दिए। उक्त भेटघाटमा संस्थाका अध्यक्ष श्री चित्र बहादुर राईले संस्थाको उपहार र सम्मान स्वरुप नेपाली "कोथीमोडा खुकुरी" लर्ड मेयर श्री किथ हाइडलाई प्रदान गर्नुभयो। परिचयात्मक भेटघाटमा "वेल्स नेपाली समुदाय", कार्डिफको तर्फ बाट संस्थाका अध्यक्ष श्री चित्र बहादुर राई, श्रीमती संगीता राई, उपाध्यक्ष श्री रबिन्द्र तुम्बाहाम्फे, सह-सचिब श्री रामचन्द्र पोखरेल, सदस्यहरु श्री बिर बहादुर गुरुङ, श्री शिबजी श्रेष्ठ र श्री महेश देवकोटाको उपस्थिति थियो।

Saturday, 20 November 2010

रिमम्बरेन्स डे मा हाम्रो सहभागिता

गत १४ नोभेम्बर २०१० को दिन कार्डिफमा आयोजना गरिएको रिमेम्बरेन्स डे मा हाम्रो संस्थाको तर्फबाट भुतपूर्व गोर्खा सैनिक, वहाँका परिवारका सदस्यहरुका साथै अन्य स्थानीय नेपाली दाजुभाई तथा दिदीबहिनीहरुले भाग लिनुभयो। बिहान १० बजे एलेक्जेन्डर बगैंचामा भेलाभई ठिक १०:५८ मा कार्यक्रमको शुरुवात भएको थियो। ११ बजेर ११ मिनेट ११ सेकेन्डको समयमा लडाईमा विरगति प्राप्त गर्ने सम्पुर्ण योद्धाहरुको सम्झनामा २ मिनेट मौनधारण गरिएको थियो। त्यसपछि राष्ट्रगान गाई उक्त भेला परेडमा परिणत हुँदै क्याथेज पार्क वरपरका स्थानमा गई अन्त्यमा स्थानीय सिटिहलमा गई समाप्त भएको थियो। कार्यक्रमको अन्तमा सिटिहलमै परेडमा सहभागिहरुका लागि चियापानको आयोजना गरिएको थियो।

थप फोटोहरु हेर्न तलको फोटोमा थिच्नुहोला

Thursday, 4 November 2010

दशैं – तिहार २०६७ कार्यक्रम सम्पन्न

गत अक्टोवर २३ तारिख, शनिबारका दिन वेल्स नेपाली समुदाय, कार्डिफको आयोजनामा "दशैं – तिहार २०६७ कार्यक्रम" भब्य रुपमा सम्पन्न भयो। कार्डिफ र कार्डिफ वरपर रहेका सम्पूर्ण नेपाली दाजू भाई तथा दिदी बहिनिहरुलाई समेटदै नेपालीको महान चाडहरु दशैं र तिहार एउटै थलोमा मनाएर भरपुर मनोरंजन दिने उद्देश्यले आयोजना गरिएको उक्त कार्यक्रम साँस्कृतिक टोलीको सामुहिक प्रयासमा "यो नेपाली शिर उचाली" बोलको देशभक्ति गीतको साथमा सुरु भएको थियो। उक्त कार्यक्रममा देशभक्ति गीतले सबै नेपाली दाजुभाई तथा दिदी बहिनीहरु र पाहुनाहरुको मन छोएको देखिन्थ्यो। संस्थाका अध्यक्ष चित्र बहादुर राईले आगन्तुक पहुनाहरुलाई दशैं – तिहार २०६७ को शुभकामना संदेश दिनुभयो भने नेपाली र वेल्स राष्ट्रिय गानले सबै दाजुभाई तथा दिदीबहिनिहरुहरुलाई देशप्रेमले भाबुक बनाएको थियो।
बिभिन्न किसिमका नाच गान, कविता, उखान-टुक्का र लोकदोहोरीले भरिएको दशैं – तिहार कार्यक्रममा आफ्नै घर भित्रको प्रयासमा प्रस्तुत गरिएको साँस्कृतिक कार्यक्रम अत्यन्त रोचक र मन छुने खालका थिए। साँस्कृतिक कार्यक्रममा भाग लिएका साना साना बाबु नानी हरु देखि लिएर ठुला बडाको जोश र जाँगरले बाताबरणनै अत्यन्त उत्साहित देखिन्थ्यो। साँस्कृतिक कार्यक्रममा भाग लिने आफ्नै घर भित्रका कलाकारहरु विभूषित भट्टराई, प्राजन पोखरेल, शुभाआशिष श्रेष्ठ, प्रान्जिल पोखरेल, शौभाग्य मोक्तान, आभाष देवकोटा, आयूष्मा श्रेष्ठ, आयूष श्रेष्ठ, प्रसंशा कन्दंवा, संजिता लिंग्देन, प्रिती गुरुङ, अम्बिका गुरुङ, जेबिना तन्डुकार, रोशा चेम्जोङ, अस्मिता गुरुङ, सुमन तिमिल्सिना, महेश देवकोटा, मोति पुन, खैमति पुन, साबित्री श्रेष्ठ, सन्जु भट्टराई,चित्राकला देवकोटा, शोभा पोखरेल, अमर मल्ल, शिवजी श्रेष्ठ, रोशन भट्टराई र राम
चन्द्र पोखरेलहरुले देखाएका नेपाली सस्कृति झल्कने नाच गान, कविता, उखान-टुक्का र लोक-दोहोरीले गाउँघरनै बिर्साएको थियो।
कार्डिफको सेन्ट मेलन भिलेज हलमा भएको उक्त कार्यक्रममा सजिसजावटका झिलिमिली सामग्रीहरुले हलको रुपरंग सौन्दर्य जनक देखिन्थ्यो। देशी तथा बिदेशी पाहुनाहरुको समेत उपस्थित रहेको उक्त कार्यक्रममा पाहुनाहरु वेलायती संसदका सांसद माननीय एलन माईकल, कार्डिफ काउन्सिलका काउन्सिलर गेभिन कोक्स, कार्डिफ काउन्सिलकी डेपुटी लिडर काउन्सिलर जुडिथ उडम्यान, भोलुन्टियर एक्सन कार्डिफकी हेलेना जोन्स का साथै वेल्स गोर्खा कम्युनिटि, कुम्बरानका अध्यक्ष लक्ष्मी लिम्बुको उपस्थिति थियो भने मुख्य अतिथि एलन माइकलले नेपाली भाषाबाट दिएको दशैं-तिहार शुभकामनाले सबैको वेल्स प्रतिको आत्मियता अझ मजबुत भएको आभाष हुन्थ्यो। यसै कार्यक्रमको मध्यतिर मुख्य अतिथि एलन माईकलले संस्थाको लोगो प्रतियोगिताका बिजयी तथा सहभागि र गत समर बारबिक्युमा म्युजिकल चेयरमा प्रथमहुने भाईबहिनीहरुलाई पुरस्कार तथा प्रशंसा पत्र प्रदान गर्नुभएको थियो। दिनको ५ बजे शुरु भएको उक्त कार्यक्रम मध्यरात सम्म पनि दाजुभाई तथा दिदी बहिनीहरु आफैमा रमाउँदै नाच गानमा ब्यस्त देखिन्थे। कार्यक्रमको अन्तमा संस्थाका उपाध्यक्ष रविन्द्र तुम्बाहाम्फेले कार्यक्रमको सफलताको लागि हात बढाउने सम्पुर्ण सदस्यहरुका साथै कार्यक्रममा पाल्नुहुने दाजुभाई तथा दिदीबहिनीहरुलाई धन्यवाद दिनुभयो र साथसाथै साँस्कृतिक कार्यक्रमका सहभागिहरुलाई अध्यक्ष सहित संयुक्त रुपमा प्रशंसापत्र प्रदान गर्नुभएको थियो। कार्यक्रमको संचालन संस्थाका सचिव रोशन भट्टराई र सह-सचिव रामचन्द्र पोखरेलबाट भएको थियो।

कार्यक्रमका अन्य फोटोहरु हेर्न तलको फोटोमा थिच्नुहोला



Sunday, 31 October 2010

दशैं-तिहार २०६७ कार्यक्रमका भिडियो दृश्यहरु

हालै सम्पन्न वेल्स नेपाली समुदाय, कार्डिफको दशैं-तिहार कार्यक्रमको केहि भिडियोहरु:

कार्यक्रमको शुरवात : यो नेपाली शिर उचाली (सांस्कृतिक टोलीको सामुहिक प्रयास)




जमाना नयाँ छ चाहना नयाँ छ : साना नानिहरु (प्राजन, शुभाशिष, बिभुषित, प्रान्जिल, सौभाग्य, आयुष्मा, आभाष र आयुष)



दशैं धुन (सुमन तिमिल्सिना)



गैरिखेतको शिरै हान्यो (संजिता लिङदेन)



वसन्तनै बस्न (प्रशंसा कन्दङ्वा)



कौडा नृत्य (सावित्री कार्की, शोभा पोखरेल, चित्राकला देवकोटा, रामचन्द्र पोखरेल, रोशन भट्टराई र अमर मल्ल)



घान्द्रुके ठिटी म त (अम्बिका गुरुङ र प्रिति गुरुङ)



कविता-ठट्यौली (महेश देवकोटा)



आधुनिक नृत्य (प्राजन र प्रान्जिल पोखरेल)




हिन्दी गितमा नृत्य (जेविना तन्डुकार)



आधुनिक नृत्य (संजिता लिङ्देन)








बिभिन्न विभागका उप-समिति गठन

वेल्स नेपाली समुदाय, कार्डिफका कार्यसमिति सदस्यहरुको संयोजकत्वमा हालैमात्र २ बिभिन्न विभागहरुका उप-समिति गठन गरिएको छ। हाललाई ३ सदस्यीय उप-समिति निर्माण गरिएकोमा अन्य नेपाली दाजुभाई तथा दिदीबहिनीहरुलाई पनि समेट्दै निकट भविश्यमै ५ सदस्यीय बनाइने कुरा अवगत गराउन चाहन्छौं। संस्थाका सदस्यहरु महेश देवकोटा र अमर मल्ल संयोजक रहनुभएको भिन्न उप-समितिका सदस्यहरुको नामावली यसप्रकार छ।


संगठन विस्तार विभाग उप-समिति

* महेश देवकोटा (संयोजक)
* अमृत गुरुङ (सदस्य)
* सुरज शर्मा (सदस्य)

युवा, खेलकुद तथा विधार्थी विभाग उप-समिति

* अमर मल्ल (संयोजक)
* सरोज लिम्बु (सदस्य)
* धनेन राई (सदस्य)

कार्डिफ र कार्डिफ वरपर रहनु भएका नेपाली दाजु भाई तथा दिदी बहिनीहरुलाई वेल्स नेपाली समुदाय, कार्डिफको साझा फुलबारी भित्र समेट्न प्रयास गर्ने संगठन विभागको उद्देश्य रहेको छ भने युवा, खेलकुद तथा विधार्थी विभागले नेपाली युवाहरुलाई खेलकुद तथा युवा विकाशको अन्य अरु विविध क्षेत्रमा सामेल गराउने प्रयास गर्नेछ।

Thursday, 7 October 2010



वेल्स नि
वासी सम्पुर्ण नेपाली दाजुभाई तथा दिदीबहिनीहरुमा
बडा दशैं २०६७ को शुभ
उपलक्षमा मंगलमय शुभकामना।
यस पुनित अवसरमा सम्पुर्ण नेपाली
परिवारको सुख शान्ति एवं
समृद्धिको कामना
गर्दछौं।